Image from rappler.com via google.com.
Ha pagmalakapeperdi hin iba-iba nga mga sektor ngan grupo hiton Singbahan nga Katoliko, damo na la nga mga butang in ginmamalakahimo upod na an pagmalakahuhurma hin istorya han aton mga kaapoy-apoyan antes pa umabot an Katoliko nga mga Kastila. Usa na hini an pagpasarang hin istorya nga an aton kapurupud-an inin usa na nga Muslim nga nasud hadto nga mga panahon. Kundi bisan hi Lapulapu nga ginkikilala nga siyahan nga "Pilipino" nga bayani nga waray palupig han mga Kastila inin subay han iba pa nga mga alamat inin ginamit hin espada nga iginhatag hin sirena. Diri ada ini nahisusubay hiton kanan Muslim nga relihiyon.
Kun aton kukulawan an kasaysayan han mga nasud nga mayda mga sakto nga mga talaan o sinurat mahitungod han ira mga kaapoy-apoyan, mababasahan naton nga an mga Muslim inin nagtikang ha Arabia ngan nagsarang tipasidlangan ngan tipanatundan. An ira pagtipanatundan inin ginamitan nira hin kusog militar - pinaagi han pakig-araway inin nahitindog nira an ira relihiyon ha mga nasud ha Aprika ngan tipakadto ha Europa. Upod na han ira nasakop an pira nga mga estado ha tuna han Iberia (diin aadto an yana na nga Espanya ngan Portugal). Kundi ha tipasidlangan, an ira pamaagi inin mas mamurayaw - an mga Muslim nga mga duminagko inin nakig-asawa han mga anak nga kababayen-an han mga kahadian ngan ini nga mga ginhadian in nagin mga Muslim na nga mga katunaan. Sanglit mas mahinay an dalagan han paglangbo han islam ha sinirangan kontra han tipanatundan.
Ha haros 800 ka tuig, an Iberia inin nasakop han mga Muslim. Kundi waray nira kabag-o an pagturun-an han kadam-an han mga Iberiano. Ngani, han mga tuig 1248, usa na la nga estado, an Granada, nga nahabilin nga nahiiilarum han liderato han mga Muslim ngan ha pag-abot han 1492, hasta an Granada inin nabawi na han mga Katoliko nga mga kahadian han Espanya. An Portugal la an binulag nga estado han Espanya sanglit an Iberia inin nagkamayda duha nga mga ginhadian - an Espanya ngan Portugal. Hini nga tuig nga an mga Muslim inin napaiwas na han mga espanyol o Kastila ha ira lugar, nagtikang naman an ira pagkadto hin magkadiro-dilain nga mga katunaan han kalibutan pinaagi han pagtabok han kadagatan han Atlantiko nga sinundan han pagtabok han kadagatan han Pasipiko.
Ha pakatabok han mga Espanyol ha kadagatan han Pasipiko, ira naman napudngan an hinay-hinay nga pagpadukwag han relihiyon nga Islam ha kapurupud-an nga gintawag nira nga Pilipinas - alinsunod han hadto prinsipe Felipe II nga nagin hadi kamatay han iya amay, hi Carlos I. Sanglit, usa gud nga masisiring naton nga grasya han Diyos nga an nasud nga nakahimo tumindog kontra han Islam ha ira katunaan bisan ha maiha nga panahon nga ira kasakop hini in asya man daman an makakapugong han paglangbo hini nga relihiyon dinhi nga aton dapit. Mayda gud dako nga misyon nga igintalaan han Makagarahum nga Diyos ha aton basi kita naman in magin mga paragpasamwak han Kristiyanismo tikang ha Pilipinas tipakadto han kabug-osan han Asya ngan tipabalik ngadto ha Europa!
_________________________________________
Greenland, Barangay Songco, Ciudad han Borongan
Ika-5 han Setyembre 2021
Ika-23 nga Domingo han Katuigan
Walang komento:
Mag-post ng isang Komento